مغامرات طلاب الطب في مشفى الرازي

[الطارق]

لسلام عليكم ورحمة الله وبركاته
اليوم كان أول يوم من أيام التدريب في مشفى الرازي أو إذا بدكم (مجزرة الرازي)
وأنا رح حاول حطكم بصورة الوضع بشكل يومي ممكن شي واحد ما كان مقتنع
وبعد ما يسمع شو عميصير تعجبو الشغلة ويروح وبعدين على الأقل يكون في شي موضوع
موضوع مفيد بهالصيفيه عسى ولعل أنو بعض السيتاموليين يفيدونا كمان لأنو أكيد في شباب
أو بنات عميستغلو العطلة بشكل حلو وخاصة العشرة الأوائلنا(أبطال الروضة الخضراء) اللي لازم يعطونا شوي من خبرتن وما يبخلو علي
وعفكرة ياريت إذا حدا تاني عميروح عالمشفى يحكيلنا كمان شو صار معو وشو استفاد

---------------------------------------------------------
المشاركة كتبت بواسطة الطارق في غير موضوع :
السلام عليكم ورحمة الله وبركاته
إلى جميع طلاب الطب الراغبين في التدرب في قسم الإسعاف في مشف الرازي التوجه إلى قسم الإسعاف في المشفى وتقديم طلب إلى مدير المشفى تعلمه فيه برغبتك في التدرب لتحصل على الموافقة والتدريب سيكون مركزا على الإجراءات الإسعافية على اعتبار أننا طلاب سنة أولى واللي عندو أي استفتار يبعتلي رسالة خاصة .....

[الطارق]

ا

تقرير عن اليوم الأول :
والله يا جماعة الخير أول ما دخلت على المستشفى أصابتني حالة غريبة من الإكتئاب
وفكرت أكتر من مرة أنو أطلع أقرأ اللوحة اللي عالباب وأتأكد ليكون مخربط وجاي
على دائرة دفن الموتى بدل المشفى
بلا طول سيرة عليكم دخلت على قسم الإسعاف وسألت طالب هنيك شو لازم أساوي
فقلي لبيس الصدرية وتفرج شو عبصير
والله طالعت الصدرية من الكيس اللي ما عدت شفتو ولبستها ودخلت على صندوقة قصدي على غرفة
فيها رجال عمرو حوالي 50 سنة في كتلة غريبة بكتفو بلشو الدكاترة يستأصلولو ياها
سألت شو هي قالولي كتلة شحمية وعفكرة أنت الك كل الأحقية بالسؤال لكن بعد
ما شقولو الدكاترة وبلش هالدم ينزل شعرت بدوخة ومعدتي صارت تقلب بس بعدين
استنتجت أنو هو شعور طبيعي لكل طالب ممكن يشوف هيك منظر لأنو نفس الشي
صار مع عبد القادر وبعدين شفت الدكاترة كيف خيطو
وصرنا بعدها نتنقل من حالة لحالة وشفنا الحالات التالية
حالات جروح ناتجة عن شقاوة الأطفال وطبعا عن طريقها تعلمنا الخياط
حالة حادث سير شفنا عن طريقها عظام مشط القدم شخصي
حالة جرح نتج عنو تمزق وتر آشيل (العرقوب)
حالة عصاب ناتجة عن صدمة عاطفية(اللهم عافينا)
حالة غيبوبة لفتاة ضربها أخوها على راسها ظلما وعدوانا
أما الحالة الأهم واللي استفدنا منها أكتر شي هي حالة خناقة وتمكننا من خلال
فضول عبد القادر أنو ندخل على غرفة العمليات الإسعافية في خطوة جريئة أدهشت باقي الطلاب
الحالة كانت عبارة عن ضربة سكين نتج عنها قطع الشريان والعصب الكعبريان
وتعلمنا كيف نتعامل مع الحالة وكمان الدكاترة كانو كتير متعاونين معنا ويجاوبونا
بكل شفافية عن أسئلتنا الفضولية ومنها أنو شو فائدة محلول رينجر بهالحالة
فأجابنا الدكتور أنو هو محلول بيزيد كثافة الدم لوقت ما يصل الدم بالإضافه لبعض الأسئلة
التشريحية اللي كشفنا الدكتور عن طريقها أنو نحن سنة تانية
نهفات :
وقت اللي دخلنا على قسم العمليات الإسعافية ماكنا منقدر نساعد بشي غير بأمور
تمريضية (يعني اشتغلت ممرضة عآخر الزمن )فبعد ما خلصنا طلعت أنا من الغرفة
لابس صدرية بيضا فشافتني أخت المريض بوشا وقالتلي (شو دكتور طمنا) أنا
هون كبر راسي وقلتلها (لأ الحمد لله صار أحسن )بس مو هون النهفة
النهفة أنها سألت عبد القادر كمان ولا الفهيم راح قلها (والله مقطوع عندو شريان
وعصب ويمكن ايدو رح تروح)يعني ما كان ناقص يقلها إنا لله وإنا إليه راجعون
النهفة التانية أنو أحد الدكاترة مخيط جبينو فسألو دكتور تاني (وين خيطت هون)
فرد عليه الدكتور (لك له يا زلمة معقول أسلم حالي هون)
عذرا للإطالة وبشوفكم بكرة مع مغامرات جديدة

[تقوى]

السلام عليكم
كانت مغامرتكن حلوي كتير :36_1_50:
بس ممكن أعرف شوية معلومات :sita123:
يعني هالدورة التدريبية بدها تسجيل ولا شو
وأي طالب ممكن يفوت على غرفة العمليات ولا الشغلة بدها اجراء :10_9_134:
وممكن نروح نسجل بهالكام يوم ولا كل دورة الها مدة محددة
وشكرا

[Homam]

بس غريب كيف الدكاترة عم يجاوبوا بكل شفافية؟؟!!
انا لو كنت محلن ماكنت جاوبت بصراحة
لأنو كل شي بوقتو حلو

[abou-yamen]

السلام عليكم
امبارح أي قبل شي ساعتين
داومت بالمشفى لمدة شي 5ساعات....وكان اليوم رائع ومليء بالأمور المهمة
طبعا هاد ما كان أول يوم لإلي
أنا داومت خلال الفصل التاني شوي

المهم بدأت المشوار مع جرح بالقدم من الناحية الأنسية لطفل
وخيطتو ...بعد تثبيت الطفل من قبل الشباب مشكورين .. وبعد أن عبا المستشفى صياح وبكي...
وبعدها جاء رجل منقولا على حمالة ضاربتو سيارة
تبين بعد التصوير أنه مصاب بكسر أسفل عظم الظنبوب
وكسر عظمي ساعد... وما بعرف شو كمان لأنو بس أخدت المعلومات من جماعة العظمية
كان هناك جروح متفرقة كثيرة
مثل جرحين بالرأس بنفس الوقت لطفلين بنفس العمر وبنفس الدرجة من البكاء والجعير...
اشتغلوهن الشباب
وهناك جرح أسفل الساق من الخلف
...كان في حالة حلوة..
اللي هي إصابة بسكينة في الناحية الألوية مخترقة للألوية العظمى
فخيط الدكتور العضلة بخيط ديكسون .. واشتغلو الشباب الجرح السطحي...
في جرح خيطتو لشب قدنا عمبدرس ميكانيك سنة تانية وحشي الفخذ..
وقال شو.. قعدنا على شايفك قبل هالمرة ... وأنت بتلعب سلة بالهندسة... لأ يمكن بنادي الجلاء.. وآخر الشي ما حزرنا...
بالعظمية كان في حالة كسر قاعدة مشط أول يسمى ذلك الكسر (كسر بنت)
واحتاج لقبول بالمشفى مشان عملية...
منرجع عالأسعاف:
إجت وحدة بالعة مسحوق غسيل !!!!!!!!!
بس هي ما كملت شو صار معها (ما شاء الله من كتر الحالات ما بتلحق بتشوف كل شي)
في حالة صبية وقعانة على ظهرا..اختبر الدكتور بعض حركات الطرف السفلي..
وطلب منها الوقوف
وبعد ما وقفت.. قللنا: بس المريض وقف عحيلو اجزموا أنو ما في كسر بالفقرات حتى يثبت العكس...
............
وحكالنا دكتور شوي عن فائدة واستخدام الـ NG tube:Nasogastric tube
وشو فائدتو بمعرفة انثقاب المعدة .. حيث ننفخ فيه بعد إدخاله حتى المعدة
ثم نشاهد عالصورة إذا تجمع الهواء (يمكن تحت قبتي الحجاب)
بالإضافة إلى فوائد أخرى.....
ومعلومة أخرى : كل واحد شربان نفط أو غاز أو مشتقاتهون
أو حتى في حالات حوادث السيارة مثلا
رح يطلب المريض أن يشرب ماء...بس لازم ما نعطيه لأنو احتمال يصير معو ريح صدرية استنشاقية وهي أخطر بكتير من الشي اللي صاير معو بالأول...
والله ما عبتذكر في كتير حالات.....
بس آخر الشي حضرنا عملية تفجير صدر لطفل مضروب بسيارة...
بعد أن بينت الصورة الشعاعية بأن لديه خمس أضلاع مكسورة يمنى وثلاثة يسرى
وأعتقد التفجير كان بسبب حصول حالة ريح صدرية ضاغطة (أعتقد)
وما تشوف عيونكن بعد ما اخترق الدكتور العضلات الوربية ووصل للجنبة شلون سمعنا صوت الهوا وهو عميخرج من الجرح.. وبلش يخرج سائل بكمية كبيرة من الجرح.. طبعا هذا قبل وضع المفجر....

نهفات اليوم:
لا يوجد....
نهفات قديمة:
سأل الدكتور طفل في جناح العظمية أثناء مشاهدة صورته الشعاعية (ناحية المرفق):
- أديش عمرك ؟؟؟؟
- إشو..
- شقد عمرك؟؟؟؟
- إش بعرفني!!!!...... بابا شقد عمري؟؟؟؟
فأجاب الأب 12
النهفة الأكبر أنو صورة هالطفل الشعاعية شككت الدكاترة بوجود 3 كسور في أسفل عضده وأعلى عظمي ساعده...
وكانو رح يساولو قبول بالمشفى.... وعمل جراحي!!!!!
فتبين بعد مراجعة الدكتور الأخصائي...عدم وجود أي كسر... وإنما هذه الخطوط على الصورة الشعاعية عبارة عن خطوط تعظم!!!!!!!!!!!

نصيحة أخذتها من طلاب أكبر مني:
لا تخيط بإيدك لبعد ما تداوم شي 10 أيام بالمشفى ...
وطبعا لما بتخيط تحت إشراف طالب أكبر منك أو دكتور...
ولا تخجل من عدم المعرفة.. لأنو بين إيديك بشر!!!
وانتباه... من الممرضين ما يضحكو بعقولكن ويسلموكن كل شي ولو ما كنتو بتعرفو...

أتمنى أكون ما أزعجتكون بهالحكي الكتير...
وادعولي
أخوكم حسن

[abou-yamen]

يعني هالدورة التدريبية بدها تسجيل ولا شو

أختي الكريمة بإمكانك تتدربي بمستشفى الرازي بورقة تدريب من ديوان المستشفى
وبعدين بس تخلص مدة الورقة بتكوني تعرفتي عالطاقم بالمشفى
فبصير بإمكانك تدتربي عطول (والله أعلم )

وأي طالب ممكن يفوت على غرفة العمليات ولا الشغلة بدها اجراء
لا ما بدها إجراء
غير تستأذني الدكتور .. وتقولي له أنا طالبة طب... وبس

وممكن نروح نسجل بهالكام يوم ولا كل دورة الها مدة محددة
وشكرا

إيمتا ما بدك ... بس لما بدك تاخدي الورقة .. اذهبي صباحا مشان يكون الديوان فاتح...

والسلام

[Stethoscope]

ما زلت مصراً !! قد لا تستفيد بقدر ما تتشوش !!

قصدي إنو الروحة ع الرازي هلق ، وبهالمرحلة ، شو ممكن تفيد ونحن مااااااااااااااااا منعرف شي غير أسماء العضلات؟

وأنا عم اقرا الموضوع ، كنت عم فكر أنا شو خسرت من عدم ذهابي ، وطلع معي إني ما خسرت أي شي !! بالعكس أنا اللي شايفه إني استفدت أكتر ، وخليني ناقش الشغلة نقطة نقطة :

التقرير الأول من طارق :
أول حالة حالة الكتلة اللي بالكتف : سؤال : فهمت شي شو هالكتلة ؟ أنا من ناحيتي كلمة "كتلة شحمية" بعتبرها كلمة للتسكيت بامتياز ، يعني ما فيها جنس العلمية ، شو هي كتلة شحمية !!! بظن نخلص دراسة وما يمر علينا هيك مصطلح !!! يعني بظن إنو ما حدا فهم لا شو هي ولا شو سببها ولا شو طرق علاجها ، هل نعالجها جراحياً ولا العلاج المحافظ (بالأدوية دون جراحة) بحل المشكلة ؟ كل هالشغلات مناخدها بالرابعة والخامسة بالجراحات ، بقا وين طاحشين نحن ؟

حالات جروح ناتجة عن شقاوة الأطفال وطبعا عن طريقها تعلمنا الخياط
حالة حادث سير شفنا عن طريقها عظام مشط القدم شخصي
حالة جرح نتج عنو تمزق وتر آشيل (العرقوب)
حالة عصاب ناتجة عن صدمة عاطفية(اللهم عافينا)
حالة غيبوبة لفتاة ضربها أخوها على راسها ظلما وعدوانا

هدول بشوفهم ((كل)) يوم بدون استثناء ، وما في شي ينزعل عليه

أما الحالة الأهم ....كانت عبارة عن ضربة سكين نتج عنها قطع الشريان والعصب الكعبريان
وتعلمنا كيف نتعامل مع الحالة وكمان الدكاترة كانو كتير متعاونين معنا ويجاوبونا
بكل شفافية عن أسئلتنا الفضولية ومنها أنو شو فائدة محلول رينجر بهالحالة
فأجابنا الدكتور أنو هو محلول بيزيد كثافة الدم لوقت ما يصل الدم بالإضافه لبعض الأسئلة
التشريحية اللي كشفنا الدكتور عن طريقها أنو نحن سنة تانية

نفس الحكي السابق ، إنتو شفتو أحد تدبيرات قطع العصب والشريان الكعبري ، بس شو عرفكم ببقية التفصيلات ، بجوز تكونو استفدتو شوي ، بس أنا ماني ندمان ، لأني بهالفترة كنت عم راجع مسير الشريان والعصب الكعبري بالنظري (أكيييييد إنتو كنتو نسيانين وما متذكرين هالشغلات) ... شغلة بتأكد كلامي هي سؤالكم عن محلول رينجر ، بما إنا ما آخدين فيزيولوجيا ، وما حدا بيعرف شو ماهية محلول رينجر ، ولا شو آلية تأثيره ، بقا شو الفائدة؟ بس هيك عرفتو إنو كثافة دم وتأخير!؟ هي إذا اعتبرنا إنو اللي قالو الدكاترة صح وعلمي ، بجوز اللي عم يجاوبك ما عرفان الله وين حاطه وعم يجاوب من عقلو ! يعني ما تستغرب بكرا تشوف استخدام جديد لهالمحلول وتسأل ويطلع "محلول مطهر!!!!!!"

تقرير حسن :
...كان في حالة حلوة..
اللي هي إصابة بسكينة في الناحية الألوية مخترقة للألوية العظمى
فخيط الدكتور العضلة بخيط ديكسون .. واشتغلو الشباب الجرح السطحي...

كمان نفس الحكي ، حدا بيعرف شو هاد خيط الديكسون ؟ وشوفي خيوط كمان ؟ وليش ديكسون ؟ وإيمتى منستخدم الديكسون وإيمتى منستخدم الزيرو وإيمتا وإيمتا ؟؟؟ كمان هدول مناخدون بالجراحات (بظن إنو مناخدون بالجراحة الصغرى -سنة تالتة فصل تاني-) ؟ بقا ليش العجلة ؟

وبعد ما وقفت.. قللنا: بس المريض وقف عحيلو اجزموا أنو ما في كسر بالفقرات حتى يثبت العكس...
وأخيراً ، معلومة ممكن نفهمها !! ليليليليليلششششش ، مبروك

رح يطلب المريض أن يشرب ماء...بس لازم ما نعطيه لأنو احتمال يصير معو ريح صدرية استنشاقية وهي أخطر بكتير من الشي اللي صاير معو بالأول...

هاهاهاهاهاهاها ، قلتلي ريح صدرية استنشاقية ....وأخطر كمان ؟؟؟ هاهاهاهاها

وما تشوف عيونكن بعد ما اخترق الدكتور العضلات الوربية ووصل للجنبة شلون سمعنا صوت الهوا وهو عميخرج من الجرح.. وبلش يخرج سائل بكمية كبيرة من الجرح.. طبعا هذا قبل وضع المفجر....
أنا من ناحيتي بفضل اقرا ليش الهوا طلع من الجرح ما دخل !!!! وقبل ما شوف هيك شغلة بفضل أعرف شو هاد المفجر ، وبذكر إنو أحد أنواع التفجير (تفجير الصدر تحت الماء) بكون بالجهاز في قنينة مي داخل منها أنبوب وطالع منها أنبوب ، أنا بظن إني أعرف سبب هالشي هلق أهم لألي من إني اسمع صوت (الهوا) وهو عم يطلع من الجرح !!
صعي والله ، شو هاد الهوا !!! من وين إجى !!
والحلو إنو : "طبعاً قبل وضع المفجر"

بالنهاية ، ما بعرف إذا إنتو متلي أو لأ ، بس أنا النهار عندي عم حسو شي 4 ساعات بدل 24 ، يعني ما عم لحق ساوي شي مفيد بالنهار !! مع إني ما عم أطلع من البيت غير للضرورة القصوى ، ومع ذلك مشاريعي عم تمشي متل السلحفة ، فإذا كان بدي روح عالمشفى فأكييييد ما رح افضى ساوي شي تاني ، so ، أحسنلي ضل قاعد بالبيت عم اقرا غايتون واتعلم فيجوال ... خليكم

ملاحظة صغيرة : تخيل حالك محل الدكاترة اللي عم تسألوهم ، بكونو عم يقولو لحالن : "ولي عليهم هالفصاعين ، لسه ما بيعرفو شو هاد الجرح وجايين عم يسألو ، إففففف "

لحقانيييييييييييييين يا شباب ، شو بقيتو لتتعلمو السنة الجاية والبعدا ؟؟؟

ما حدا يناقشني ، لأنو تناقشنا قبل بمرة ومستحيل غير رأيي ... إنتو أحرار وأنا حر

epocsohtets !!!

[bebo87]

أنا نزلت مرة وحدة عالرازي ويمكن أنزل كم مرة كمان هاالصيف بس شفت أنو الرازي ما فيو غير فائدتين رئيسيات :
1. وهو الأهم كسر الحاجز النفسي والشعور بجو المهنة المستقبلية وتشوف حالك إذا بتحسن بتتأقلم مع جو الأدمية والصياح والأوجاع والأهات والبكاء وغيرو كتير
2.تعلم الأشياء التمريضية أكتر بكتير من الطبية متل (ضرب الإبر وخياطة الجروح )
طبعا هالحكي لطلاب السنة الأولى بشكل خاص أنا برأيي أنو الأول أهم من التاني لأنو التاني إيمتا من كان بتحسن بتعملو وبوقت أـقصر بالسنوات المقبلة
أما بالفائدة الطبية فبحس أنها كتير قليلة أو حتى معدومة وأنا بوافق بالرأي stethoscope من ها الناحية

[الطارق]

بالنسبة لمحمد متل ما قلت أنت هاد رأيك يعني رأي شخصي بيختلف حسب طريقة تفكير كل شخص
يعني أنا بالنسبة الي وقت اللي بشوف الحالة أدامي ممكن تترسخ معي بالمستقبل أسرع بكتير من أنو أكون ما لي شايفها يعني استفدت أكتر من أنو أكون
أول حالة حالة الكتلة اللي بالكتف : سؤال : فهمت شي شو هالكتلة ؟ أنا من ناحيتي كلمة "كتلة شحمية" بعتبرها كلمة للتسكيت بامتياز ، يعني ما فيها جنس العلمية ، شو هي كتلة شحمية !!! بظن نخلص دراسة وما يمر علينا هيك مصطلح !!! يعني بظن إنو ما حدا فهم لا شو هي ولا شو سببها ولا شو طرق علاجها ، هل نعالجها جراحياً ولا العلاج المحافظ (بالأدوية دون جراحة) بحل المشكلة ؟ كل هالشغلات مناخدها بالرابعة والخامسة بالجراحات ، بقا وين طاحشين نحن ؟
هلق أنا كانت هي أول حالة بشوفها بالمشفى يعني بعدني ما كنت آخد عالجو لذلك ما سألت عنها كتير وعلى كل حال حتى لو ما فهمت شو هي بس بالمستقبل أكيد رح أفهم شو هي لما آخدها بالجراحة بشكل أفضل وحتى طريقة علاجها لأنو رح كون شايفها عملي
هدول بشوفهم ((كل)) يوم بدون استثناء ، وما في شي ينزعل عليه
وأنا كمان بشوفهم ((كل))يوم بدون استثناء بس في فرق بين أنو شوفهم وأوقف مكتوف الأيدي أو أشوفهم وأنا قادر على التصرف تماما يعني بتقدر تقول أنو خلينا نبعد عن دراسة الطب شوي وناخد الموضوع من زاوية تانية أنو أنا كإنسان عادي كيف ممكن أتصرف في حال صارت معي أو مع حدا من أهلي هيك حالة لا سمح الله
نفس الحكي السابق ، إنتو شفتو أحد تدبيرات قطع العصب والشريان الكعبري ، بس شو عرفكم ببقية التفصيلات ، بجوز تكونو استفدتو شوي ، بس أنا ماني ندمان ، لأني بهالفترة كنت عم راجع مسير الشريان والعصب الكعبري بالنظري (أكيييييد إنتو كنتو نسيانين وما متذكرين هالشغلات) ... شغلة بتأكد كلامي هي سؤالكم عن محلول رينجر ، بما إنا ما آخدين فيزيولوجيا ، وما حدا بيعرف شو ماهية محلول رينجر ، ولا شو آلية تأثيره ، بقا شو الفائدة؟ بس هيك عرفتو إنو كثافة دم وتأخير!؟ هي إذا اعتبرنا إنو اللي قالو الدكاترة صح وعلمي ، بجوز اللي عم يجاوبك ما عرفان الله وين حاطه وعم يجاوب من عقلو ! يعني ما تستغرب بكرا تشوف استخدام جديد لهالمحلول وتسأل ويطلع "محلول مطهر!!!!!!"

أولا مين قلك أنو نحن نسيانين مسيرن وتانيا مو حرام عليك تغتاب الدكتور يا مارق يا منافق(صرت شيخ) وتالتا أنو اللي حكا الدكتور كان صح شوي لأنو من خلال عملي بالصيدلية كنت أعرف بعض المعلومات عن محلول رينجر أكدتلي أنو اللي حكا الدكتور صح يعني لا تحط حدا بزمتك وعفكرة هو محلول بينحقن بالوريد متل السيروم حتى كيسو نفس كيس السيروم فمستحيل يكون محلول مطهر:sitelw56:
كمان نفس الحكي ، حدا بيعرف شو هاد خيط الديكسون ؟ وشوفي خيوط كمان ؟ وليش ديكسون ؟ وإيمتى منستخدم الديكسون وإيمتى منستخدم الزيرو وإيمتا وإيمتا ؟؟؟ كمان هدول مناخدون بالجراحات (بظن إنو مناخدون بالجراحة الصغرى -سنة تالتة فصل تاني-) ؟ بقا ليش العجلة ؟

هالشي رح رد عليك في بالمشاركة التالية:36_1_50:
هاهاهاهاهاهاها ، قلتلي ريح صدرية استنشاقية ....وأخطر كمان ؟؟؟ هاهاهاهاها
بظن أنو هالشي لا سمح الله ممكن يصير مع أخوك أو أختك أو أبوك أو عمك أو خالك لا قدر الله
فبهالحالة أنت أكيد لما تكون تعرف هالمعلومات هي رح تعرف كيف تتعامل مع الحالة كمان بعيدا عن دراسة الطب والفائدة المرجوة للسنوات القادمة:36_6_3:
أنا من ناحيتي بفضل اقرا ليش الهوا طلع من الجرح ما دخل !!!! وقبل ما شوف هيك شغلة بفضل أعرف شو هاد المفجر ، وبذكر إنو أحد أنواع التفجير (تفجير الصدر تحت الماء) بكون بالجهاز في قنينة مي داخل منها أنبوب وطالع منها أنبوب ، أنا بظن إني أعرف سبب هالشي هلق أهم لألي من إني اسمع صوت (الهوا) وهو عم يطلع من الجرح !!
صعي والله ، شو هاد الهوا !!! من وين إجى !!
والحلو إنو : "طبعاً قبل وضع المفجر"
نفس الحكي أنو لما تدرس الحالة وأنت شايفها أفضل من أنو ما تكون شايفها:sita123:
بس أنا النهار عندي عم حسو شي 4 ساعات بدل 24
يبدو أنك عمتمشي على برنامج هرمز واللي ما بيعرفو يروح يشوفو بموضوع الدكتور حازم تبع التطلعات للعطلة ومن النقاط الهامة في أنو بيقضي ساعتين كل بالتواليت:36_1_10:
أحسنلي ضل قاعد بالبيت عم اقرا غايتون واتعلم فيجوال ...
إذا كل هاد عمتحكي عن الفائدة بشو ممكن يفيدني الفيجوال طبيا يعني برأيك ممكن تبرمج المريض على مواعيد الدواء ولا يدفعلك الكشفية اللي بدك ياها ولا لحتى تنزلو برنامج إنا لله وإنا إليه راجعون:sit43fk:
لحقانيييييييييييييين يا شباب ، شو بقيتو لتتعلمو السنة الجاية والبعدا ؟؟؟
أنت ضمنان حالك تعيش للسنة الجاية واللي بعدها:36_1_4:
ما حدا يناقشني ، لأنو تناقشنا قبل بمرة ومستحيل غير رأيي ... إنتو أحرار وأنا حر
أنا ما عمناقشك بس عمحاول وعي الشباب لحتى ما يتأثرو بأفكارك الرجعية:36_1_10:
وبالنهاية استرو ما شفتو مني الله وكيلكم محمد لعالي قلبي:10_9_134:

[الطارق]

السلام عليكم ورحمة الله وبركاته
تقرير اليوم التاني
اليوم ما كان في كتير حالات بس استفدنا أكتر من مبارحة أولا من خبرة ممرض كان موجود هنيك
ساعدنا إلى أبعد الحدود على اعتبار أنو ما كان في زحمة وكان في متسع من الوقت
فحكالنا عن أنواع الخيوط وشو الخيوط اللي منستعملها مع كل حاله من الحالات مثلا أنو منستعمل الخيوط(1)
في حالات الجلد السميك وأنو الخيوط الحرير والنايلون هي خيوط ممتصة منستخدمها في الخياط الداخلي
متل الجروح العميقة اللي منخيطها من جوة بخيوط نايلون بعدين من برة بخيوط عادية كمان منستعملها مثلا
بخياط الأمعاء وعفكرة الخيوط الممتصة هي خيوط مصنوعة يمكن من الأمعاء وهي خيوط لا تحتاج إلى فك
وإنما ترتشف بالجسم وحكالنا كمان عن أنواع الخيوط الأخرى واستعمالاتها متل الديكسون وغيرو
وكمان علمنا نقيس الضغط وصرنا نجرب ببعضنا أنا وهاني وحسن
وكمان اليوم استفدنا من خبرة الملك أبو يامن اللي ساعدنا كتير وأخدنا فرجانا وين يتصير عمليات التجبير
واللي انفتحت قريحتو الشعرية لما شاف طبيب عميخيط ذقن مريضة خياطة عادية وطول الجرح شي 3سم
بدل الخياطة التجميلية
أكتر حالة مؤثرة شفناها اليوم هي بنت شلفت حالة من الطابق التالت وللأسف لما جابوها للمشفى متوفية
والمنظر كان مريع والدم مغسلها تغسيل
نهفات
النهفة الأولى أنو أحد الأطباء كان عميخيط اصبع طفل فخدرو تخدير موضعي وللعلم أنو التخدير الموضعي بتم
تحت الجلد ضمن الجرح فلاقا أنو التخدير ما كان كافي وطلب مني أجبلو علبة المخدر جبتلو علبة المخدر
ولا ألاقيلكم فهيم زمانو راح شك السرنغ القديم نفسو بالقنينة وخدر المريض فقلتلو لحسن كيف استعمل نفس
السرنغ وهو منزع دم يعني ممكن إذا المريض معو شي مرض (ايدز مثلا ) ينقلو لكل المرضى اللي رح
يستعملو من هالمخدر فقلي يا زلمة بدك تتعود عالدكاترة
النهفة التانية أنو وقفنا أنا وهاني نضمد جرح طفل بعد ما علمنا الدكتور وطلب منا نضمدو بعدين راح
الدكتور فلف هاني الشاش لفة منيحة الله يعطيه العافية بعدين جينا عالبلاستر لزقنا نحاول نقطع ما ينقطع
معنا لا بحلال ولا بحرام وكل مرة أنا قلو لهاني معلش لف لفة تانية وهو يقلي لف لفة تانية
لحتى صار سمك البلاستر أسمك من الشاش وبعدها استطاع هاني بكل شجاعة أنو يقطع الشاش وبعدها
قلتلو لهاني علوة يطلعو من المستشفى قبل ما حدا يشوف هالضماد اللي بهوي
اعذروني عالإطالة وبشوفكم بكرة مع مغامرات جديدة وبانتظار قصيدة حسن عن مشفى الرازي

[Stethoscope]

ما رح أقتبس وناقش ، لأنو متفقين إنو هالموضوع مالو نهاية ، بس بدي وضح نقط :

هدول بشوفهم ((كل)) يوم بدون استثناء ، وما في شي ينزعل عليه
قصدت إني ممكن شوفهم بأي نهار بروح فيه عالمشفى ولو بعد عشر سنين!!

يا مارق يا منافق
الطارق عم يقول كلمة مارق !!! مو معقول ، تعا يا هرمز وخود نسخة عن هالصفحة ....

يبدو أنك عمتمشي على برنامج هرمز واللي ما بيعرفو يروح يشوفو بموضوع الدكتور حازم تبع التطلعات للعطلة ومن النقاط الهامة في أنو بيقضي ساعتين كل بالتواليت
ما تظلمني ، مشروع هرمز قائم على الخروج من العطلة دون أي استفادة ، صياعة وبس!!!
اللي عم قولو إنو في أولوليات للفائدة ، راجع موضوع الدكتور زياد المثبت في هذا القسم "معلومات يجب أن نعرفها عن السنوات القادمة" واللي قصدتو ، إنو المذكور بهالموضوع ما عم ساويه مع إني ما عم روح عالمشفى ، بقا كيف إذا كنت عم روح ؟؟!!!

وتتهنو على كل حال، وأتمنى لي ولكم كل الفائدة ، وأهلا وسهلا !!!!

[MALR]

أنا مع النيربية 100 /100 لانو هيك صار فيني في الفصل الثاني و خصوصا وقت عبطبق قواعد علي حسن
كل شريانان يبعدنا مسافة أقل من نصف ملم يتفاغران
شريان الفخذي يتفرع و ينتهي بلانهائية
وانا برأي على الطلاب يلي عبنزولوا على المشفى يتعلموا اهم شي الخياطة و ضرب الابر و قياس الضغط
أنا عند سيدي الخياطة من الجامعة الامريكية عطاني ياهونsome one. يلي بدو انسخلوا ياهون مقابل بس يدعيلي و يلي عطاني ياهون
و السلام و التوفيق للكل و احذروا الدم و التهاب الكبد الوبائي

[Hermes]

حبيبي نيربية

ما بدك تنزل علمشفلى

مافي داعي تنزل

بس كمان ما مفي داعي تصرح بهل شي في جميع المحافل

شو عررفك انو النزلة مو مفيدة

ليش عم تحطلنا تقديرك الشخصي

ممكن هيك تقنع عالم بكلامك و يبطلو ينزلو

مع انو كلامك ممكن يكون غلط

و خطيتهن برقبتك

لا تفكر انو هاد الموضوع فكرتو القتيل على صحة النزلة علمشفى
او اثبات راي واحد و جلب النقيض علتاني

الفكرة كتير عجبتني و هيي انو اقرا شو عمصير مع الشباب بالمشفى
حالات سريرية
نهفات
.............
....

بتمنى تتقبل كلاني كنصيحة
و nothing personal

اخي العزيز ةعامس

[Hermes]

و شغلة تانية

الكلام يلي حكيتو بموضوع الرياء
عفوا (موضوع تطلعاتك)

كان ردا على شطط الشباب

يعني كل واحد ما شاء الله بدو يقرا 200
كتاب

و يدرس مواد سنة سابعة

و بدو يتعلم الانكليزي باللهجتين

و خود على ريــــــــــــــــــــــــــــــــــــــــــاء

و على مين بجيب الخطة الامثل
او عفوا الاكثر لفتا للانظار

هاد الموضوع ضربلي على عصبي و خصوصا
انو نزل بفترة الفحص و الموت
لهيك طرقت هداك الرد

و عفكرة نقطة التواليت
بنيتها على احصائية على بعض الطيور (جمع الطائر)

ويلي عندو عصافير بيعرف انو ممكن يقضو اكتر من ساعتين بالتبرز

سلامات

[INSPIRE]

ممكن حدا يشجعني أكيد بس مشان أنزل معو مو لحالي !!!!!!!!!!!

للي بدو يروح ياخدني معو

بجي ثواب

[السحاب]

لنوطبعا عن طريقها تعلمنا الخياط
يا سلام نوع جديد من التعلم"التعلم عن طريق الفرجة"قصدي النظر


وتعلمنا كيف نتعامل مع الحالة
هذا يؤكد المقولة السابقة وعبتصور حالي عبعمل عملية ما متل ما شفتا على إيد دكتور بالرازي ما بعرف مستوى اللي لازم اثق بعلمه

وهو الأهم كسر الحاجز النفسي والشعور بجو المهنة المستقبلية وتشوف حالك إذا بتحسن بتتأقلم مع جو الأدمية والصياح والأوجاع والأهات والبكاء وغيرو كتير
2.تعلم الأشياء التمريضية أكتر بكتير من الطبية متل (ضرب الإبر وخياطة الجروح )
شو هالاستنناج الحلو انا معط بالمية مية بيبو


أشوفهم وأنا قادر على التصرف تماما
شو هاد يومين و صار بدو يشيل"كتلة شحمية منة الكتف" و لا شو "تماماً"


:36_6_3: :36_6_3: :36_6_3: :36_6_3:


هوت الدراسةفالطب يسألُ................ما بال طلابي بالضياع تتسربلُ
في كل يومٍ و الغباء رفيقنا................ديكسون ولا فهم والمعيشة حنظلُ
والرازي أمسى مدنساًفي موطني.............و الأولى في شتى الغرف تنقّلوا

و بعرف حالي ما بتواخذ

سلامات سلامات

[الطارق]

السلام عليكم ورحمة الله وبركاته
أولا شكرا كتير هرمز على رأيك وأنت فعلا شجعتني أنو أكمل بهالموضوع بس يمكن متل مالك شايف الشباب كل واحد قاعد ببيتو الله أعلم شو عميساوي بعدين بيجي بقيم تجربة غيرو بدون ما يشوف شي بعينو هو أنا صحيح مليت من الردود و التبريرات بس معلش رح أكمل بس مو للإقناع بالروحة على المشفى لأنو كل واحد حر بحالو وأنا من وقت ما نزلت الموضوع كان هدفي متل ما قلت أنت وتغيير شكل عن مواضيع الإشراف البايخة اللي شفنا الشباب انبحتو فيها وصار يشاركو فيها شي بطعمة وشي بلا طعمة مع أنها مواضيع فارغة
وبحب قول للأخ سحاب اللي ما بعرف مين هو أنو إذا موضوع ما عجبك مو بالضرورة ترد عليه وخاصة بلهجة السخرية اللي استخدمتها وكأنك قرفان مع أني ما اعتدت عليك أنو ترد بهالطريقة هي وتحط العصي بالعجلات وأنت قاعد بالبيت بدون تشوف شي بأرض الواقع وهلق رح أناقش النقاط اللي ذكرتها
يا سلام نوع جديد من التعلم"التعلم عن طريق الفرجة"قصدي النظر
ياريت تنزل ليوم واحد عالمشفى وتشوف كيف ممكن تتعلم عن طريق النظر وبعدين أنا قلت أنو تعلمت ما قلت أنو خيطت أنا شغلي بالمشفى محصور بالضمادات مو أكتر لأنو بالنهاية هي أرواح بين ايدي
هذا يؤكد المقولة السابقة وعبتصور حالي عبعمل عملية ما متل ما شفتا على إيد دكتور بالرازي ما بعرف مستوى اللي لازم اثق بعلمه

بتمنى تقرأ الردود منيح بعدين ترد لأنو الحكي اللي حكيتو كان عبارة عن امور اسعافية و أنا ما قلت أنو دخلنا على قسم الوعائية وتعلمنا كيف نخيط الشريان أنا قلت انو كيف نتعامل مع عملية النزف الشرياني وكيف نوقف النزف وبظن أني قلت أنو القسم اسمو قسم العمليات الإسعافية
شو هاد يومين و صار بدو يشيل"كتلة شحمية منة الكتف" و لا شو "تماماً"
رجاع اقرأ الرد منيح بتشوف أنو ما كان هاد قصدي

وبالنهاية بحب نبهك لنقطة التعلم عن طريق الفرجة لتكون مفكر أنو إذا صرت سنة رابعة أو خامسة رح يسلموك مريض ويقلولك خود اشتغل إذا كنت مفكر هيك بتكون غلطان
وبالنهاية ياريت يا شباب لا تغيرو منحى الموضوع وكل واحد عندو رأي يتركو لنفسو وخاصة إذا كان مالل وحابب يتسلى متل سحاب

[Unforgiven]

وأنا برد على السحاب كمان بالنسبة لسؤالع عن التعلم بالنظر:

لعلمك بالدول المتطورة في الطب ،الطالب ما بيعمل أي عملية قبل ما يشوف هالعملية فوق 50 مرة
لو ما في فائدة من هالطريقة في التعلم كانوا ما طبقوها!!!! مو هيك؟؟؟؟

الفائدة الرئيسية من الذهاب إلى المستشفى في هذا الوقت هو معرفة أهم طرائق الإسعافات الأولية متل ضرب الإبر و خياط الجروح وقياس الضغط و في مرحلة لاحقة تعليق السيروم وهناك فوائد ثانوية كتييرة أهمها هو معرفة بعض الحالات يللي ممكن أنو تمر علينا في المستقبل،ما منخسر شي اذا عرفنا كم شغلة من هالحالات يللي عبتمر عالمستشفى ونحن ما نمتلك معلومات عنها.

أنا بشجع كل طالب سنة أولى أنو يذهب لمستشفى الرازي عالقليلة مشان يتعود على جو المستشفى من مناظر الدم والبكاء والصراخ ،عن جد لا تستهونو بهالموضوع

وشكراً

[hani89k]

السلام عليكم
رجاااااااااااااء شديد ياشباب لا بقى تحولو المواضيع القيمة إلى بياخة
يعني نحن فتحنا هالموضوع لنحط فيه الحالات يللي منشوفها مولحتى تعبر عن رأيك الشخصي القيم بالنزول إلى المشفى
هي شغلة بتخصك
كل واحد يهتم بالشي يللي مقتنع فيه
أصلا مو معقول بنوب ننزل كلياتنا عالمشفى لأن مارح يتسع
لذلك لابقى حدا يعبر عن رأيه الشخصي
ok بظن كلامي واضح

[الإسلام]

كلامك أخ هاني صح وبتمنى يلتزم الأعضاء بالموضوع ومايخرجوا عنه أنا بحكم ظروفي التدريب صعب إلي بالمشفى فقررت تابع الموضوع واستفيد من الملاحظات اللي عم يعرضها الشباب
وفعلا بالبداية صار هيك بس بعدين خربت الشغلة .
رح أقترح اقتراح اللي بداوم بالمشفى يعرض كل شي جديد تعلموا وبعدها بيقوم أنصار النظري
(بكير ندخل المجال العملي حسب رأيهم لقلة زادنا العلمي ) بالمناقشة العلمية وعرض مايملكونه
من معلومات ولنقوم بالبحث في الأمور التي نجهلها وبذلك نكون فكرة عملية وعلمية ونكون متممين لبعضنا البعض بدلا من الجدال .
مع الأمنيات بمستقبل ناجح مرض لله عز وجل
أخوكم الإسلام

[Stethoscope]

أولاً ، تم حذف السخرية من رد السحاب ، ويا ريت ما تتكرر هالشغلة ، أنا ذكرت رأيي المخالف وقلت إنو النقاش ما بينتهي ، بالتالي خلص ما عاد حدا يناقش لأنو مالو طعمة النقاش بعد هلق

ثانياً ، بالنسبة لاقتراح الإسلام ، فهو نظرياً حلو ، بس عملياً : نحن (أنصار النظري) ماننا دكاترة لحتى نفهم كل شي عم يصير بالمشفى ، كل اللي عم نقولو إنو تقوية اللغة ، وقراءة مواد طبية تمهيدية (تشريح ، فيزيولوجيا ، ...) برأيي أهم ، والشغلة تقدير شخصي ، وهالمواد حتى لو قريتن (مع إني مستحيل اقراهن بالصيف كلن) ، بالتالي ما بإمكاني بهالمواد قدم شي لغيري ... ما بعرف أنا هيك رأيي

ثالثاً : الموضوع للتثبيت

[MALR]

ياشباب ان بقترح جمع الحالات السريرية خياطة +معاينات مع أبو يامن و بعدين واحد بحسن نطبعون . نقراؤهن نتمعن فيهم و............. الخ و يكون بلغة واضحة مو بين ضحكة و جد ومنحطن على شكل ملف اكرو بات أو وورد
رجاء شديد من نيربية ان يساعدنا في هالموضوع وألف مبروك على التجديد للولاية الثانية ونحن معك

[الطارق]

السلام عليكم ورحمة الله وبركاته
شكراكتير لسماعه على تثبيت الموضوع وبصراحة انا كنت مقرر انو ما كمل بعد ردود السخرية اللي وردت لكن تثبيت الموضوع شجعني على الإكمال وبتمنى يساعدوني الشباب ويكتبو شو عميصير معهم متل هاني وهرمز وحسن اللي أحيانا ما عمتكون أيام دوامنا متوافقة لذلك عميشوفو شغلات ما عمشوفها وأنا آسف إذا كان ردي على السحاب قاسي لكن هو اضطرني لهاشي
ولكن رجاء حار لا تغيرو مسار الموضوع وكل واحد يحتفظ برأيو لأنو لا هو رح يقنعني ولا أنا رح أقدر أقنعو وبكرر شكري لسماعة
أولا تعلمنا تركيب القثطرة البولية بالبداية منحقن فازلين بالإحليل لحتى يتخدر المجرى البولي والدكتور حقن تقريبا تلت سرنكات ويعدين دخل القثطرة بسهولة لأنو الفازلين بساعد على الإنزلاق وبالنهاية الكتور حقن سيروم بالقثطرة اللي وصلت عالمثانة لحتى امتلت واتنبهت ونزل البول بكيس جمع البول الموصول بالقثطرة
وتعلمنا كمان عملية فتح الوريد أول شي منربط لصطيكة تخينة على الساعد لحتى تظهر الأوردة ومندخل الإبرة تبع الكانيولة بالوريد ومنتأكد من دخولها بشكل جيد أو بالأحرى بالطريق الصحيح عن طريق سحب الإبرة الداخلية ببطء فإذا دخل الدم عالإبرة بشكل نظامي معناها شغلنا صحيح والدكتور قال أنو أفضل الأوردة اللي ممكن نفتحها هو الوريد الرأسي اللي بيمر بمصعط المشرحين مع الشريان الكعبري لكن المعتاد هو أي وريد من أوردة ظهر اليد وطبعا يفضل في حال الحوادث أنو مباشرة نفتح الوريد
وشفنا كمان عملية خياط وتر العضلة مثنية الرسغ الزندية والحادثة حصلت أثناء الجلي انكسر الصحن وجرح النهاية البعيدة للساعد وكان ممكن يقطع الشريان الكعبري لكن الحمد لله عدت على خير وحصل كمان أذية للعصب الزندي أدى لخدر في مناطق تعصيبه باليد (راجع تشريح 1)وطبعا خياط الوتر تم بخيط كروميك وهو خيط ممتص لذلك يرجى من جميع السيتاموليات والسيتاموليين أخذ الحيطة والحذر أثناء الجلي لأنو بهاليومين أجا تلت حالات من هالنوع
وطبعا الصعوبة بالنسبة لخياطة الأوتار دائما بتكون بإيجاد طرفي الوتر وهاد الشي دفع الدكتور أنو يبعت مريض مقطوع عندو وتر مثنية الإبهام إلى غرفة العمليات
وكمان شفنا حالة طفل قعد على صحن قام انكسر ودخل بالعضلة الألوية العظمى ووصل للعظم وطبعا كان في خطر على الطفل أنو ينصاب بالشلل في حال انصاب العصب الوركي لكن الحمد لله أنو عدت على خير وهون الدكتور خيط العضلة الألوية العظمى أولا وبعدين وبعدين خيط خياطة داخلية وبالنهاية خيط خياطة سطحية لكن النهفة أنو الطفل مع كل هدول كان نايم
وعفكرة فقرات التعظم اللي كان كان الدكتور علي حسن يحذفها هي من اهم الفقرات لأنو كتير منحتاجها بعملية تشخيص الكسور يعني أول ما بتشوف الصورة لازم تسأل عن العمر لحتى تقدر تفرق بين خط التعظم والكسر
تعلمنا كمان تشخيص كسر الكعبين الأنسي والوحشي الناتج عن السقوط من مكان مرتفع
واليوم كمان شفنا حالة مؤثرة جدا وهي سقوط طفل عمرو سبع شهور من الطابق الأول وبعض اجراء الصور اللازمة اتأكد الطبيب أنو الطفل سليم والحمد لله لكن بقي تحت المراقبة
وتأكدت كمان من تأثير تعاطي الحبوب المخدرة على عملية التخدير لأنو الممرض استخدم علبة ليدوكائين كاملة لحتى حسن يخدر المريض موضعيا وطبعا الشكل كمان ممكن يأكد التعاطي
وشفنا كمان حالة عصاب وهون الدكتور قال أنو بحالات العصاب المريض بكون بجسمه كمية زائدة من الأكسجين منلجأ اما لحبس النفس أو نخلي يتنفس بشي مغلق لحتى تزداد كمية ثاني أوكسيد الكربون
أما في حالات ضرب الإبر بالعضلة الألوية العظمى فمندخل الإبرة بالربع العلوي الوحشي أما بالعضلة رباعية الرؤوس الفخذية فمنقسم الفخذ لثلاث أقسام ومنضرب بالثلث المتوسط
والبنسبة لحالات الجروح في المناطق اللي فيها أوتار فلازم نتأكد من سلامة الأوتار والأعصاب والشرايين قبل كل شيئ
أولا منتأكد من سلامة الشرايين وطبعا هالشي ببين من النزف وفي حال كان النزف شديد مالنا غير نتاكد بالنظر وهاد الحال الوحيد أما بالنسبة للأعصاب فعن طريق آليات اختبار الأعصاب اللي علمنا ياها الدكتور متل مسك الورقة أو الشاش بين الأصابع أوتنبيه العصب ذاته في حال إيجاده ثم سؤال المريض عن المناطق اللي صار فيها خدر
اما بالنسبة للأوتار فممكن يبين الوتر المقطوع بالنظر أما في حال ما كان ظاهر فمنختبر حركات جميع العضلات الممكن أنو تتواجد بهالمنطقة لكن هون في نقطة نبهنا عليها اليوم الدكتور وهي انو في حال كان المصاب طفل أكيد ما رح يقدر يتجاوب معك في طلب الحركات لذلك لجأ للتأكد من حركته عن طريق تنبيه النهايات العصبية في الإبهام فحركو وهاد دليل على سلامة العضلة مثنية الإبهم على اعتبار انو الجرح كان بمكان مرور وترها
وشفنا كمان حالة صرع بس ما استفدنا منها لا طبيا ولا تمريضيا والشغلة الوحيدة اللي استفدنا منها أنو لازم يكون معك شي عشرة لحتى تقدر تثبت المريض
طبعا ما توسعت كتير بالحالات المتكررة وهي كانت الحالات الجديدة أو الغريبة

[السحاب]

مرحبا شباب

أولاً أنا أعتذر عما ورد مني في المشاركات السابقة ، وما ذكرته أنا ليس رأياً شخصياً كما اعتبره الصديق هرمز ، وإنما هو رأي من سبقني في هذا المشوار الصعب ، وهو أخي الكبير الذي احترم رأيه كثيراً ، وهو من ينير سبيلي في هذا الطريق ... (أخي يختص جراحة - سنة أولى)

وأحببت أن أشكر الأخ "الإسلام" الذي لا أعرفه شخصياً للأسف ، وقد أعجبتني فكرته وقررت أن أنفذها بعد الاستعانة بما قرأته حتى الآن من الفيزيولوجيا ، وبخبرة أخي كتعبير عن حسن نيتي ، وإليكم نتيجة بحثي أقدمها على طبق من فضة :
بالنسبة للقثطرة البولية : تذكر أنه يوجد نوعان من القثطرة ، واحدة عبر السبيل البولي وهو ما ذكره الأخ طارق ، ويتم بحقن فازلين وقد يخلط الفازلين مع مرهم ليدوكائين لتخفيف الرضوض التي ربما تحدث عند الذكور (تذكر أن أكثر الأجزاء قابلية للإصابة أثناء القثطرة هي الإحليل الغشائي عن الذكور)

بالنسبة لفتح الوريد : فبعد التحري ، قيل لي أن أكثر الأماكن شيوعاً لفتح الوريد هي :
عند الأطفال : وريد فروة الرأس (شائع جدا) ، وسنأخذ عنه المزيد من التفاصيل في التشريح 3 كما سترون
عند الحاجة لفتح وريد مركزي : carotid vein
عند الحاجة لفتح وريد سطحي (الحالة العادية) : الوريد الرأسي (الكافلي) والقاعدي (البازلي) في الساعد ، وذكرت ما فعله الطبيب في الرازي لأخي وصديقه فأصيبوا باشد الاستغراب ، وقالوا لي أننا منطقياً نبتعد عن الأماكن الحركية عند فتح الوريد وذلك كي لا نعيق المريض إذا لم يطرأ طارئ يجبرنا على ذلك

بالنسبة لحالة الجلاية التي كسرت الصحن ، فلفت نظري أن هناك عصب متأذٍ إلا أن عزيزي الطارق لم يتطرق إلى التدبير الذي اتخذه المسعف لعلاجه ، فبالسؤال ، قيل لي أن أذيات الأعصاب -بالحالة العامة- لا نعالجها فوراً ونكتفي بربط الشرايين والأوتار في حال قطعها ، ونترك الأعصاب لمدة أشهر كي تلتئم جروح المادة العصبية في العصب قبل إجراء العمل الجراحي إن كان مطلوباً

بالنسبة لكسور الكعب ، فلقد وجدت أن الموضوع أكبر من اخوض به على صفحات الموضوع ، فاعذروني

العصاب : هو عنوان عريض جداً (وكأننا نقول أمراض الرئة) وتشمل عدة أمراض ذات أساس نفسي منها الهيستيريا والفصام (شيزوفيرينيا) والقلق وغيرها مما لا يهمكم كمتدربين
كل هذه الأمراض قد تترافق بأحد أشكالها باضطرابات حركية (تنفسية غالباً) ، مما يؤدي إلى ازدياد معدل التنفس ، وهنا تصبح الحالة لها علاقة مباشرة بالفيزيولوجيا ، ولن تدركوها حتى تستوعبوا فيزيولوجيا التنفس بشكل كامل ، إلا أنها باختصار :
يزداد معدل التنفس ، تزداد نسبة O2 في الأسناخ وتنقص نسبة CO2 وبالتالي تنقص نسبة HCO3 وبالتالي تنخفض الحموضة وبالتالي يزيد الPH ويؤدي هذا إلى معمعة تنفسية قد تودي بحياة المريض
الحل : نضع كيس على رأس المريض ، تزداد نسبة CO2 في الهواء ضمن الأسناخ فينحل في المخاطية فتزداد الحموضة وتعود الPH إلى حالها
يجب علي أن أذكر أن لكل من التغيرات السابقة تأثير معين على الجملة الإعاشية وبالتالي زيادة وإنقاص معدل التنفس ، ولا يسعني أن أذكر الآلية هنا ، وأظن أن هذا القدر من المعلومات كافٍ لكم كمتدربين

بالنسبة لحالة الصرع اللي شفتوها ، فباختصار : السبب خلل بفيزيولوجية عمل بعض الخلايا المخية ، مما يؤدي إلى استثارتها بشكل مرضي ينعكس بهذه النوبية الصرعية
(معلومة علي الماشي:هناك مرض اسمه الشلل الرعاشي أو داء باركنسون ، له نفس المبدأ الفيزيولوجي مع الاختلاف الكبير بالأسباب والتظاهرات)
أهم تدبير اسعافي في حالات الصرع هو تأمين مجرى تنفس للمريض بأي شكل ، إذ أن مكمن الخطورة في النوبة الصرعية أن المريض غالباً ما يختنق ، وأهم الخطوات هي :
وضع المريض بوضعية خاصة إذا نجعل المريض يضطجع على جنبه ويده تحت رأسه ، والغاية الاساسية من هذه الوضعية هي منع لعاب المريض من الدخول إلى مجرى التنفس
مسك اللسان أو تثبيته ، لمنع تنبيه الأعصاب الإعاشية المعصبة للبلعوم وجذر اللسان بواسطة اللسان نفسه لضمان عدم حدوث قلس معدي مريئي يؤدي لدخول محتويات المعدة إلى الرغامى وبالتالي الاختناق
والأفضل والأكثر فعالية والذي (((يجب))) فعله عند توافر الإمكانية والخبرة هو تنبيب الرغامى

وشكراً لكم جميعاً (تحية عطرة إلى صديقي يسوف)

أستودعكم الله

[الطارق]

شكرا كتير أخي سحاب على هالتعاون وهاد تعبيرعن حسن نية منك وأنا آسف على اللي بدر مني
بس حبيت نوه بالنسبة للعصب الزندي المتأذي أنو الطبيب قال أنو بعد شهرن بتتحسن لحالها وبانتظار تقرير هرمز عن اليوم اللي تولى المهمة عني اليوم

[abou-yamen]

أخي السحاب أخي سم.ماعة
ملاحظة وتنبيه سريع:
نحن كطلاب سنة أولى نداوم في مشفى الرازي ليس من مهمتنا أن نعلم كل شيء عن الحالة السريرية التي نراها. . . .
ولا حتى المشاركات اللي منزلها بهالموضوع تكون من أجل إفادة الغير بالمعلومات التي اكتسبناها بالمشفى
وإنما عبارة عن عرض لما جرى أمامنا لتحقيق عنصر التشويق للآخرين
ولإعطاء فكرة عامة عن جو المشفى والتعامل مع الحالات السريرية -للذين يرفضون فكرة المشفى- والآخرين..
المهم نحن نسعى بالمشفى دائما لمعرفة
what is medicine

وشكر للسحاب على معلوماته القيمة التي أفادنا بها

أتمنى تكون الفكرة وصلت
وأتمنى أن لا أضطر لشرخها مرة أخرى

والسلام

[Hermes]

Er الرازي يوم الخميس ما بعرف شقد بالشهر - 7 – 2007

حالة انقطاع وتر باسطة للبنصر لسيدة اثناء الجلي
بهيك حالة الدكتور بدور على طرفي الوتر
و في حال ما لاقا احدهم بشق الجلد (بشفرة) حتى يلاقيهم
طبعا اختفائهم هو نتيجة سحب العضلة للوتر و جره
لاحظت كمان انو بحاول يفصل الجلد عن النسيج يلي تحتو
بادخال اداة تشبه المقص و فتحها تحت الجلد
(انا بظن انو هي الممارسة لزيادة الحرية بفحص المنطقة)
بعدين بدور شو خرج يكون في شي تاني مقطوع (عصب مثلا)
و وقت يلي بلاقي طرف الوتر بثبتو مكانو
عن طريق تثبيتو مع الجلد براس ابرة عادية

بعدين يشدو لمحلو و بثبت اصبع المريض بوضعية البسط
و لو كانت المثنية مصابة كان ثبتها بالثني
(اي واحد عمساعدو بثبتلو ياها)
و بيبدا خياطة الوتر بخيط يمتص داخليا
و المميز انو ما بيقطع الخيط متل القطب لعادية
و انما بخيط زيكزاك

اخر شي بثبت يد المرض بوضعية البسط
عن طريق الجبصين و بينفك الجبصين بعد 20 يوم

هاد يلي شفتو بخياطة الوتر
علميا ممكن يكون غلط 100 % و ممكن يكون صح

نهفة :
كان الدكتور يجس بطن المريض
و سأله : بايش حاسس ؟
فأجاب : جـوعـــان

[Hermes]

مأساة :
رجل مصاب برسغه بالصاروخ (missile)
اول شي رفض ينضرب ابرة مخدر
و بعد جهد جهيد تم اعطاؤه الابرة غصبا
بعد تثبيته بتلة من الدكاترة و الممرضين

يبدو انو عقلاتو على قدو لانو الاصوات يلي طالعها
و المسبات و الترفيس بخللوك تفكر جديا انو مجنون

بعد اعطاء الابرة و اجراء بعض الفحوص
تبين وجود انقطاع وتر مثنية الرسغ الزندية
و طبعا اثناء اجراء الفحوص
انتخر راسنا ب :
ولك شوي شوي و لك شوي شوي
و لك شوي شوي و لك شوي شوي
بنغمات مختلفة و مبتكرة

و يكفر بالله حينا و يستنجد به حينا
و يسب و يلعن و ووووو

ثم تم نقله لقسم العمليات الاسعافية

اثناء العملية لم يكف عن المطالبة بابرة المخدر
مع انو عجزنا لحتى اخدها اول مرة

و ما سكر تمو ولا لحظة و كل شوي يقول
ما خلصنا ذكتور
ذبحتوني
و وقت يلي منقلو يلا خلصنا ما ضل شي
بهم بالنزول عن طاولة العمليات

المهم بعد شق الجلد و و توضيح العناصر
تبين انقاع العصب الزندي ايضا

غادر الدكتور و تركنا مع المريض
ربع ساعة ... نص ساعة .... تلت رباع الساعة
ســـــــــــاعة

شو كان عمساوي يا حزركم
عــــــــم يتــــــــــــغدى

و لما سالنا كبير الممرضين بالاسعاف شو جاوب يا حزركم
مـــــــــــا دخلنـــــــــني

و نحنا مع المريض يلي نخر راسنا و كرهنا حياتنا
و ما سكت ولا لحظة

اثناء كل هل الوقت ايد المريض مفتوحة على الوسط الخارجي

و الشريان الزندي ينبض في الهواء الطلق

ما بعرف بس شو هي
>>>>عقوبة المريض على اساءة تصرفو<<<<<
مثلاااااا

بعد ساعة من المعاناة
دخل دكتور جديد
و حاكا المريض بهل الطريقة
رح بالغ شوي معلش

شوف بايبي (babe)
انت عندك انقطاع عصب زندي
نجاح العملية هون 10 بالمية
ممكن يصير معك (شبص مدري خبع مدري اينا مصطلح طبي) حسي
و ضعف حركي

شو قررت
يلا يلا
قرر بسرعة

(مع مط كل جملة مما سبق على طريقة انسات الابتدائي)

المهم المريض فات بالحيط
و ما فهم شي
و اثناء حديث الدكتور لمح انو بالجامعة و الكندي في مجهر جراحة اعصاب
المريض ما عم يفهم الكلام المباشر فكيف بالتلميح

المهم انتهى الوضع انو المريض راح علجامعة
(لا حدا يفكر انو لهداك الدكتور فضل بهل شي)
...................
..............
.......

شفت من واجبي نقل هي الماساة لحتى تعرفو شو ممكن يكون يعني "رازي"
اذا شايفين حالكن بحاجة لجرعة ماسي اخرى فانا جاهز
و لكن بوقت اخر لانو تعبت هلق

[بيكاتشو]

و أنا كمان مع stethoscope
لحقانين على جو المستشفى. اذا هالصيفية رحنا و تعلمنا هالشغلات التمريضية البسيطة واللي فعلياً ما رح يعلمونا غيرا شو بدنا نعمل بالسنوات القادمة.
أما بالنسبة للحوادث و الحالات الخطيرة هي بدا ناس دارسة هيك حالات نظرياً وفهمانة الوضع لحتى تتعامل معا مو كلمتين مختصرات عن الحالة من دكتور عم يشتغل مو فاضي يشرحلك بالتفصيل .

[حمزة]

طلاب السنة الأولى في الرازي

الله يرحم هديك الأيام اللي كنا فيها سنة أولى وكان حلمنا نخيط جرح أو نضرب إبرة

[متفاااائل]

أنا ياشباب رحت للمشفى متحمس كتير
ولما عرفوا أني طالب سنة أولى عطوني شلوت من الباب



:sitelw56:



:10_9_134:

[Abu Majid]

أنا داومت في المشفى هييييييييييييييك
ورح ضل داوم هييييييييييييييييييك
وماني سائل على رأي حدى كمان هيييييييييييييييييييييك
وكل واحد يحط لسانو في حلقو وما حدى يحكي كلام مالو طعمي
لأنو عنجد في شوية بل كتير حكي فاضي

[Ghali]

للرفع مشان تتشجعوا تنزلوا معنا على الرازي في الصيف ...بس استنوا شوي لبعد المعسكر.... و الصبايا بيقدروا من هلق ينزلوا....و الله احلى بسط (انا رحت الصيفية الماضية و كيفت ..و انشالله برجع بروح هلق)

[Jose_Hernandez]

والله ياشباب أنا من جامعة تشرين و كمان نحنا بصير عنا نهفات أكتر من هيك :
مرة يا شباب جابو واحد غميان عالمشفى ( الأسد الجامعي ) لأنو ابن خالتو ( محمد ) توفى
و الشب عم يهلوس ( محمد محمد محمد محمد ...........)
راح بعد عدة محاولات لتهدئته أجا أحد الفطاحل لعند أهل الشب و قلن : هلق وينو محمد مشان يراضيه و يريحو .................................................. ..................

و مرة جاية أم معا ابنا الساعة 4 الصبح و كأنها رح تموت من الخوف ؟؟؟
بعد الأخد و الرد جائنا الحدث القاتل : أنا حاسستو لأبني ما عم يطول !!!!!!!!!!!!!!!!!!!
سلام

[Dr.hamshari]

شي حلو نحن مانزلنا على المشفى الا لما صرنا رابعة س هلق عامند خل على عملياتــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــ (زائدة ومرارة .....الخ)