مدرسة معهد حلب العلمي للبنات-الأميركان- والكلاب البشرية الضالة إلى متى...؟؟؟

[مُحب الله]

السلام عليكم ورحمة الله وبركاته

رمضان كريم عالكل

أنا ساكن بمنطقة تشرف مباشرة على مدرسة معهد حلب العلمي للبنات-الأميركان- والكل أكيد سمعان بإسم هالمدرسة

يومياً وأنا نازل من بيتي عالجامعة بشوف بعض الكلاب البشرية الشاردة-الطلاب- وهنن متسلقين على سور المدرسة وعبيلطشوا البنات وعبيحكوا مع البعض الأخر

يعني هالمنظر بيعبر شوي



المهم هالمنظر بيستمر من بداية الدوام-الساعة 8- للساعة 1 تقريباً

نحن بالمنطقة تعودنا على هالمنظر اليومي المتكرر....قبل ماأدخل جامعة خطر على بالي أنا وشباب المنطقة أنو نجمع بعض ونساويلهم علقة مرتبة لهالكلاب البشرية الضالة-مع المعذرة للكلاب لأني عبظلمهم بتشبيهي لهم-

المهم الفكرة مااتطبقت لأسباب كتيرة أهمها خفنا يكون في حدا منهم مدعوم من شي حدا واصل بدولتنا العتيدة ويقوم نحن ننزت بالسجن وهنن يطلعوا براءة

بالملخص عفنا هالشي الغلط يسير بحياتنا متل ماكتير في أشياء غلط ماشية بحياتنا عادي

اليوم وأنا داخل على موقع السيريا نيوز تفاجئت بخبر عن هالمدرسة بالتحديد وعن كواليس عبتصير داخلها....شي مخجل بالفعل

حبيت أنقلكم الخبر كما هو

الخبر موجود بمشاركتي التانية

[مُحب الله]

تعرضت مدرسة معهد حلب العلمي للبنات في حلب لعدة أعمال تخريبية، بدأت بكتابات على جدران باحة المدرسة من قبل مجموعة شباب تسمي نفسها "شلة أبو جهل"،




وسرق لاحقاً جهاز كمبيوتر يحوي سجلات الطالبات كاملة، وأخيراً قطع وحرق كابلات كاميرات كان من المفترض أن تصل بين الإدارة والصفوف.


أرقام موبايلات وإيميلات "الشلة" علناً على جدران الباحة





غطت الجدران أسماء مستعارة وأرقام موبايلات وإيميلات حقيقية كان أكثرها تكراراً "أبو جهل"، وكأن الجدران أصبحت دليل هواتف، كما كتبت بعض العبارات الجنسية باللغة الإنكليزية.


وقد حصلت سيريانيوز على صورة لمجموعة شباب يجلسون على الباب الخلفي للمدرسة، وقال أحد المدرسين "هؤلاء هم بعض من الشلة التي تخرب في جدران المدرسة – شلة أبو جهل – وقد اتصلنا بالشرطة أكثر من مرة للقبض عليهم، لكنهم يسارعون بالهرب، وليس من المنطق أن تبقى دورية الشرطة مداومة في المدرسة".


وقال خبير الإرشاد الاجتماعي منتصر السيد عمر "يشعر المراهق بالحرية وذلك لعدم وجود من ينصت له، حيث يصطدم هذا الشاب في المراحل الأولى من مراهقته بمفاهيم جديدة عن الجنس عن طريق وسائل الإعلام غير الموجهة فينشأ الصدام بين واقعه المعاش والصورة التي يرسمها الإعلام في ذهنيته التي بدأت بالانفتاح على الحياة".


ويتابع السيد عمر "نرى اليوم في بعض مسلسلاتنا تبايناً بين الواقع الحقيقي للمؤسسة التعليمية - جامعة أو مدرسة بنات - وبين الصورة النمطية التي يرسمها التلفاز لعلاقات عاطفية ومغامرات مراهقين داخل أسوار المؤسسة التعليمية وفق ما تقتضيه المصلحة التسويقية للعمل، مما يعطي انطباعاً لدى المتابع أن التعليم أصبحت عبارة عن علاقات عاطفية مشبوهة، ومما يدفع بعض شبابنا الذي يعاني من الفراغ النفسي نحو الميل للعب أدوار البطولة على جدران وأبواب مدارس البنات، وعلى طاولات مقاصف الجامعة وفي ردهاتها".


مسابقة لملكة جمال المدرسة!!


ملأت العديد من الإعلانات الورقية المطبوعة الجدران، وجميعها من إعداد شلة "أبو جهل"، ولا تخلو هذه الإعلانات من الشتائم أحياناً والطرافة أحياناً أخرى، كان آخرها إعلان عن تنظيم مسابقة وهمية لملكة جمال المدرسة مع مجموعة من الجوائز.


وأشارت إحدى الطالبات إلى تعاون بعض زميلاتها مع "شلة أبو جهل" حيث يجلسن في الزاوية المقابلة للباب الذي يجلس عليه الشباب، ويقمن بإخبار الشباب عن أية حركة للمديرة أو الموجهات إلى الباحة، ثم يتصلن بهم فور مغادرة المديرة للباحة.


ويرى المرشد الاجتماعي منتصر السيد عمر أن "في جميع المدارس وخاصة في المدارس الإعدادية هناك عدد من التلاميذ المشاغبين الذين عجزوا عن التكيف السليم مع زملائهم ومدرسيهم مما يؤدي إلى فشلهم الدراسي، وإلى معاناتهم العاطفية مع الجنس الآخر وخوائهم الفكري والنفسي مما ينعكس سلباً على مجمل علاقاتهم الاجتماعية".


ويضيف السيد عمر "يمكننا القول أنه من أولى واجبات وزارة التربية أن تهتم بالإرشاد النفسي والاجتماعي عبر تطوير مستوى المرشدين المعينين في المدارس ورفد هذه المدارس بمرشدين إضافيين بما يتناسب مع عدد طلاب المدرسة وذلك لتوفير المناخ السيكولوجي المناسب لتيسير عمليات التفاعل والاتصال بين المراهق من ناحية ومدرسيه من ناحية أخرى، وذلك لدفع العملية التعليمية خصوصاً والتربوية عموماً".


سرقة كمبيوتر يحوي بيانات الطالبات وصوره


قالت مديرة المدرسة أمل برهان لـ سيريانيوز "سرق جهاز الكمبيوتر الخاص بأمينة السر منذ حوالي شهرين، في حين لم يسرق كمبيوتر السكرتيرة، مما يدل أن الغاية من السرقة لم تكن مادية، وإنما بهدف الحصول على بيانات الطالبات وصورهن المخزنة على كمبيوتر أمينة السر".


كابلات توصيل كاميرات المراقبة تخرب مرتين


قررت إدارة المدرسة تركيب كاميرات في جميع الصفوف تنقل الصورة والصوت إلى الإدارة، وقبل تركيب الكاميرات وبعد مد الكابلات اللازمة لتوصيلها، قام مجهولون ليلة الجمعة الماضية بقطع هذه الكابلات (حوالي خمسين كبلاً) كما رسموا رسومات لفتيات عاريات على الجدار.


وتم إبلاغ قسم شرطة حلب الجديدة الذي فتح ضبطاً بالحادثة، كما أبلغت الجهات الأمنية المختصة، وقامت إدارة المدرسة بمسح الرسومات الإباحية، وأعيد وصل الكابلات المقطوعة.


وفي ليلة الأحد دخل مجهولون مرة أخرى إلى باحة المدرسة وقاموا بإحراق الكابلات، وفتح قسم الشرطة ضبطاً جديداً بحادثة الحرق.


وقالت المديرة نبهان "هناك احد لا يريد أن تركب الكاميرات في المدرسة، مع العلم أن الطالبات لا يعرفن عن تركيب الكاميرات شيئاً، ولا يعرف الموضوع إلا الكادر الإداري والتدريسي".


يذكر أن معهد حلب العلمي يعد من أعرق المدارس في حلب، وقد بني منذ العهد الفرنسي وكان يسمى "مدرسة الأميركان"، وهو عبارة عن تجمع مدارس هي: روضة وابتدائية وإعدادية وثانوية للذكور وأخرى للإناث، وهي مدارس خاصة تحت إشراف مديرية التربية.

.................

الموضوع خلص لهون....

سؤالي أين عناكبنا البشرية وضفادعنا البشرية اللي بيصرعونا فيهم ببرنامج الشرطة في خدمة الشعب من شلة شباب لايتعدوا أصابع اليد الواحدة تعيث فساداً وتنتهك أعراض المسلمين

والله العظيم وبدون أي مبالغة يسمحوا بس لشباب منطقتنا بأنو يطالعوا هالذعران من عنا لاماتاخد الشغلة بإيدهم 5 دقايق

كلايتنا عنا خوات وأهل صرنا نخاف عليهم يعدوا من هالشارع كلو...

ماأحلاها صارت صورة الحلبية وأهل سوريا كلهم دخلوا وقروا الموضوع بسيريا نيوز

برجع بكرر اذا بدهم الشغلة تصير على مبدأ قانون الغاب وكل مين يحصل حقو بإيدو نحن جاهزين لكل الإحتمالات

بس مو لما تشعل القصة يجوا ويقولوا في قانون

القانون عالكل .....على ابن المسؤول قبل ابن الدرويش اللي مالو غير الله

على فكرة فيكم تعتبروا رأيي السابق بإسم كل شباب منطقة تجميل حلب العلمي....

كلامي السابق من حرقة قلب لاأكثر

والسلام على من اتبع الهدى

[Usef48]

لا حول ولا قوة الا بالله

انا كنت بمعهد حلب العلمي للشباب .. يعني ما الي علاقة فيهم

حسب خبرتي بهالمدرسة ... السبب المباشر لهالحوادث هو بعض الفتيات اللي بيكونوا جايين من مناطق راقية غالباً (( مع احترامي للجميع .. وبدون اشارة لأحد ))

يعني لما بدو يجي أي شب .. ويشوف هالبنات الفلتانات عبيتعاطوا معو ... أكيد رح يرجع ويجيب شلتو كلها عالمدرسة يعرفهم عالبنات فيها


الحل الأنسب لهالمشكلة هو أن تقوم الادارة بفحص مقابلة لكل بنت رح تسجل في هالمدرسة

وخسارة أنو يصير اسم هيك مدرسة عريقة يجي بالسيرة العاطلة بسبب هيك نوع من البنات

والمشكلة أنو بنت وحدة أو تنتين عاطلات بيضربوا سمعة المدرسة كلها .. والدليل هو الحادثة اللي انتشرت من فترة 3 سنوات عن مدرسة نابلس

[Master AWH]

والله ياصاحبي أنا بتذكر لما كنت بالأميركان بالاعدادي ولهلأ بتذكر شلون دوريات الأخلاقية كانت مبلطة قدام باب الدرسة عند بداية الدوام وعند الصرفة ولهلأ بتذكر لما مرة كمشوا واحد عم يلطش حكي بس مو دخل لجوه وشو ساوه فيو شي مابينوصف قتلة مع حلاقة شعر وبعدين سحبوا عالقسم ....

طيب هالدوريات وين راحو .....ودوريات الجنائية اللي عم يفتلو .....وبعدين هيك حادثة كتير من السهل ينمسكو الجناة
يعني الجنائية لما بدها تمسكهن مو ضروري تشغل العنانة وحتى لو شغلت العنانة مابيلحقوا يهربو وبرأيي هاد كلو حكي فاضي

وبعدين المديرة بإيدها كتير شغلات يعني باعتبار في بنات عم يتعاطو مع هالشباب ماكانت المديرة بتحسن تمسكهن وتحقق معهن أو تاخد موبايل وحدة من بيناتهن ....


(((الحل الأنسب لهالمشكلة هو أن تقوم الادارة بفحص مقابلة لكل بنت رح تسجل في هالمدرس))))
شو هالحل هاد ....مابيصير منوب أولا مشان سمعة المدرسة تانيا مشان سمعة الطالبات وبعدين معقول كل مابدو تسجل وحدة أجي وأعمل معها مقابلة ...وشو رح يكون السؤال المطروح بتحكي مع شباب أو لأ .....

عكلن الحل متل ماذكرتلكن فوق أسهل منو مافي بس مو ليكون في ناس بتطبق ....

والسلام ....

[Squall]

بالفعل قهرتني من جوات قلبي لانو انا طول مرحلة دراستي كنت بهالمدرسة و لحد ما تركت المدرسة كان في عالمدخل اللي بين المدرستين حرس بيمنعوا دخول الشباب و لو انو الاحتيال عليهن كان سهل مشان الدخول ... بس بدي اعرف هدول شلون عم يتعربشوا عالسور و الله ساوت الادارة المدرسة متل كوانتانامو و لزقوا بلور مكسور على حافتو

و فعلا لهلق بتذكر شلون كان في دورية عم تلحق واحد اذعر بغابة المدرسة و كان الشرطي عم يركد وراه متل الصاروخ و لما واحد دخل و اتخبى بحمام مدرستنا قامو اجوا و دقوا في ....... لازم ترجع تتشدد الدوريات اما الاشتباك المباشر بدون الشرطة ما بظنو حل معقول


مدرسة الاميركان من اقدم و اعرق و كانت من افخم المدارس يعني من فترة عشرين سنة تقريبا كان لسا فيا طريق مشجر و ملعب تنس و ملعب قدم ما بقي منو غير الحديد و الرمل .... كانت مدرسة لا تقل عن المدارس الاجنبية و كل الناس اللي درسوا فيا من زمان بيحكولي هالشي بس للاسف هلق .............................

بس عكل حال بعد ما صدر قانون رفع الاقساط للمدارس الخاصة صار واضح انو ادارة المدرسة عم تحاول تنهض فيا و ترجع لمجدا القديم و هالشي انا ملاحظو بحكم اني درست فيا و ملاحظ التغييرات اللي عم تصير في بناء المدرسة و اتاكدوا انو فكرة الكاميرات هي فكرة الادارة الخاصة(ممثل الاصحاب)و مي فكرة الادارة المنتدبة من مديرية التربية يللي كل طلاب المدرسة انو هي اللي عم تحد من سلطة الادارة الخاصة و عم تاذي المدرسة


املي انو ارجع اشوف هالمدرسة متل ما كانو يحكولي عنا و حاسس هاليوم قريب

[مُحب الله]

شكراً عالمرور جميعاً

ومتل ماقال عبد الوهاب الشغلة سهلة كتير....بس ليش ماعبتطبق الله أعلم!!!!!

يعني كم واحد مجند من الشرطة لابسين مدني قادرين يسمكوا شلة أبو جهل وأبو لهب كمان-يضربوا على هالأسماء-

اقتباس وأشارت إحدى الطالبات إلى تعاون بعض زميلاتها مع "شلة أبو جهل" حيث يجلسن في الزاوية المقابلة للباب الذي يجلس عليه الشباب، ويقمن بإخبار الشباب عن أية حركة للمديرة أو الموجهات إلى الباحة، ثم يتصلن بهم فور مغادرة المديرة للباحة.

برأيي مافي حاجة لفحص الإختبار متل ماقال يوسف.....برأيي تنظيفة على مجال واسع لأذناب الكلاب البشرية الضالة -ضعاف النفوس من الطالبات- بتفي بالغرض

والتنظيفة تشمل الفصل من المدرسة .......

على فكرة من ملاحظتي لوجوه هالكلاب البشرية الضالة بشكل يومي أعمارهم كلها برأيي مابتزيد عن 15 أو 16 بالكتير الكتير

يعني لو الشرطة اللي حكى عنا عبد الوهاب وبشر عبتحولهم للمحكمة بظن على أقل تقدير كان كل واحد فيهم نام شهر واحد في الأحداث....وبس يطلع من الأحداث ساعتها خليه يعرف طريق المدرسة من وين

المشكلة عبتصير انو بعد مايتحول هالشارد البشري لقسم الشرطة بيجي أبوه-الشارد متلو- بيرشرش خمسميات على أبو جنب بالمخفر وبيطالع ابنو

وبالمحصلة هالإبن بيطلع مرفوع الراس-وتاني نهار بيكون رجعان للشلة وهو عبيقلهم البابا ضبطها-

الله يرحمنا برحمته أحسن شي.....

[هبة]

نحنا الأوضاع عنا غير الأميركان

من الساعة سبعة ونص للتمانة وربع زحمة كتييير وخصوصا انو المنطقة فيها 2 مدارس بنات و5 مدارس صبيان يعني تخيلو المنظر كيف بيكون

وبعد هيك الشارع رايق شوي

حتى الساعة 1 وقت الانصراف بترجع الزحمة بشكل مو طبيعي

والمشكلة انو الرصيف مليان شباب
والسيارات اللي صوات الأغاني عم تلعلع
واللي ماشية بسرعة
لا بيحترمو رمضان ولا مارمضان

انا مرة كان شتاء وتلج كتير من كم سنة وواحد رما علي طابة تلج
و ما بعرف مين تخيلو
بس الحمد لله كنت ماشية بسرعة واجت بشنتتي
الله ستر هداك اليوم




بس عنجد اوقات بتيجي الشرطة وبيكشو هالحشرات اللي بيكونو واقفين بالشوارع
ومرة كنت بالإبتدائي وجمبنا ثانوية الفنون وكان في وحدة عم يوصلها خطيبها
وبيشوفو الشرطة وبيهجمو عليه وبيعملولو قتلة غير شكل
والبنت صارت تبكي انا ما عرفت اضحك او ابكي على هالموقف
ياحرام

شقد شراشيح بيخربو الشوارع
وعلى فكرة الكل بيكونو من حثالة المجتمع

عنجد شي بيقرف امام المدارس
شوارع المدارس ............ مقرفة

[الأسيف]

اقتباس وقالت المديرة نبهان "هناك احد لا يريد أن تركب الكاميرات في المدرسة، مع العلم أن الطالبات لا يعرفن عن تركيب الكاميرات شيئاً، ولا يعرف الموضوع إلا الكادر الإداري والتدريسي".

هي أكثر وحدة بتـ.......ق و بتخلي الواحد ينفجر
بس دو الخل منو و في و لايسعني سوى التأوه و البكاء و بدي منكن ما تنسوا انو الداء مو بس بأبو جهل أو بالشرطة
لا تنسوا
أم جهل
أبوها و أخواتها لأم جهل
و القصد واضح
و غير هيك ما بقول إلا
حسبي الله و نعم الوكيل